去日本爆房 點只空間咁簡單！
香港人埋怨空間不足，連「扑嘢」都無地方，新加坡人就話，做愛毋須太多空間！大家着眼點都是空間！學吓日本人啦，佢哋唔只着重空間，仲講求情調！例如當地的時鐘酒店，不但夠晒大間，而且有特色又夠平，不論爆房定係旅行暫住，都係唔錯嘅選擇，而最重要就係唔使排隊兼夠晒私隱。
電車鏡房：TOWER’S HOTEL – 505號房
日本嘅愛情動作片經常見到男女優喺電車鏡房中肉搏，原來現實生活中同樣可以體驗得到。呢間位於大阪嘅情趣酒店TOWER’S HOTEL，佢嘅505號房跟足日本電車車卡設計而成，不論座位定扶手都齊晒，加埋佢以電車車聲同埋站聲作背景，絕對可以滿足各位男士嘅幻想。
地址：大阪市都島區中野町1-12-18
扮嘢必去：HOTEL競馬場Us – 201號房（教室）、203號房（病房）、205號房（地盤）
想玩角色扮演嘅話，呢間位於新潟嘅HOTEL競馬場Us，絕對滿足到佢哋。酒店除咗有一般設計嘅套房外，仲有多間具有特色嘅情趣套房，好似係設計成教室嘅201號房、以醫務房設計而成嘅203號房，同埋設計成地盤辦公室嘅205號房。如果再配合埋應景服裝嘅話，隨時引爆大家嘅邪念。
地址：新潟縣新潟市北區木崎2592-1
好色男女：AOKI HOTEL – 203、207號房
性學家指出鮮艷嘅顏色可以喚起男女嘅原始衝動，而呢間位於神奈川縣充滿繽紛色彩嘅酒店AOKI HOTEL，相信可以令大家重拾激情。以203號房為首嘅情趣套房，以刺激嘅紅色作主調，加上畫成天空嘅天花板，猶如置身童話世界一樣，而207號房更擺放可以玩嘅老虎機，為閨房樂趣增添玩味。
地址：神奈川縣小田原市早川3-25-1
體育一族：HOTEL CHARMANT – 327號房（健身室）、330號房（網球）、331號房（高爾夫球）
女友話你成日掛住打波唔交功課？不如試下呢間位於京都嘅情趣酒店HOTEL CHARMANT，不但滿足佢嘅需要，仲有可態引發佢對運動嘅興趣。酒店內設有多間運動主題套房，好似有齊健身設備嘅327號房、提供埋網球場嘅330號房，仲有可以打高爾夫球嘅331號房。啪啪啪完再去打番場波，或者打完波再啪啪啪都得。
地址：京都府京都市伏見區下鳥羽廣長町127
玻璃泳池：SK PLAZA – 901號房
東京嘅情趣酒店好多，只係講到最具人氣兼最過癮嘅，要數呢間位於渋谷嘅SK PLAZA 901號房！事關房內設有一個勁大嘅玻璃泳池，情侶可以嚟個鴛鴦戲水又得，想慢慢嚟攜手去到泳池旁邊嘅房間曳曳亦得。不過由於酒店最近正進行裝修，去之前記得上網查吓，睇下901號房裝修好未先。
地址：東京都涉谷區道玄坂1-17-9
和味華麗：HOTEL迎賓館 – 305、405及501號房
難得去到日本爆房，又想感受一下舊式日本嘅建築風格，呢間以超華麗和風建築而聞名日本情趣酒店界嘅HOTEL迎賓館，絕對值得一試。酒店內嘅305、405及501號房雖然房價係貴啲，但佢將傳統和風庭園同房間還原出嚟，就連小橋、流水同迴廊都有齊，仲有一個小型嘅客廳畀情侶談心。由於呢3間房經常爆滿，故此大家去之前記得預約。
地址：川崎市川崎區新川通4-7
情趣酒店 風光不再
日本嘅情趣酒店有兩種，一種叫做LOVE HOTEL（ラブホテル），另一種叫做COUPLE HOTEL（カップルホテル）。雖然名稱唔同，但實際上都係差唔多，只係後者部分會要求入住者進行登記。曾幾何時日本嘅情趣酒店憑住夢幻燈光同大浴缸，加上房價較一般酒店平，兼唔使證件登記而深受歡迎，最繁盛時期據講每年全日本有高達5億人次入住情趣酒店。不過隨住日本人口老化同人口減少，愈嚟愈少男女去爆房，早前日本厚生勞動省指日本12,000間情趣酒店嘅平均入住率僅得4成，當中唔少酒店索性變番做普通酒店，只係留番幾間特色情趣套房。
